[size=25]النيل والليل حبان شبو
يملونا محبة وينحبو
للعاشق أمو وأبو
كل الالحان نبتت جمبو
امل سودانا ومن قلبو
متدفق ريد
وجمال تغريد
بلحن فريد
بحب ووصال
هيماناً سال
وبالارسال
اهدانا مطر
وعطر يسير
دعاش وعبير
وريحة النالة
والريحان
عذب الحان
وصوت نقارة
والطمبارة
دهشة وشوق
ونيل معشوق
وعاشق الليل
ونجمة جميلة
في جبينو وسام
عامت ونامت في الضفة
والنيل العاشق في عفة
نبعوا السائل ماجف
صوت ترتيل
وجو عليل
ورود وخميل
وفرع يميل
طربان بالحيل
صدح البلبل
روضة فل
سواها مقيل
وكمان مسرح
تعال نفرح
وننسى الالام
في قيف النيل
الناس الناموا
واتراموا
قصائد واغاني
العاشق الكان بعاني
عشق الليل تابع نجمو
اتغزل وبالغ في نضمو
يحصد نجمات في الموية رسم
ودرب الحبيبة والتبانة
في سطح النيل اتلمو
وتريا تشبه ريا
وطه عشق
في هواها شرق
عسلا عشرق
من نحلة جميلة
وملكة بيت
واحلى نغم
من بنت العم
المسروقة
وبنار الحب محروقة
تعشق سارق
سيفوا يبارق
حاميها نمر
من ليل داكن
متحرك وساكن
زار انهار
والنجم انهار
شفناه نهار
في الحلة يباري
عيونو بيض وخدودو تراري
والنيل مخنوق
سدود وكباري
الله الباري
حبانا مياه
اسماك وحباري
وشاطيئ جميل
هوى الارواح
مقصد سواح
وسحر مباح
يفرق بينك وهمَّك
حزنك وهمك
ويهديك افراح
ما احلى النيل
شروق اصيل
ورود وخميل
والنجم العانق
موية النيل
في الليل افراح
وسحر مباح
يفرق بينك وبين همك
حزنك وهمك
ويهديك افراح
[/size]